Showing posts with label POLITICS. Show all posts
Showing posts with label POLITICS. Show all posts

Sunday, 22 August 2010

Vote Ki Bhik..de de



Chunaao ka saal hai,
satta ka kamaal hai,
har neta behaal hai,
paanch-saala sawaal hai,
de de baba........

VOTE de ki desh khush-haal bane,
hamaare khaane-peene laayak bhaal bane,
jis se aur moti hamaari khaal bane,
jaa tere ghar mein hamesha roti daal bane,
teri roji-roti tere liye jangaal bane,
hum kroron mein khelein tu kangaal bane,
teri haalat aur bhi fate haal bane,
lekin iss waqt tu saakshaat mahaakaal hai,
de de baba................

VOTE de ki hum apni tijoriyaan bhar sakein,
saat pushton ke sukh ka samaan kar sakein,
jaa tu na ji sake na mar sake,
kuchh karna bhi chaahe to na kar sake,
paanch saal tak tu sirf saans bhar le sake,
lekin iss waqt samsyaa vikraal hai,
de de baba......

VOTE de ki paanch saal muh naa dikhaayenge,
tu bulaayega to bhi hargij naa aayenge,
apne waadon ki tarah tujhe bhi bhool jaayenge,
apni mann-maani nitiyon se desh ko chalaayenge,
lekin fikr naa kar paanch saal baad fir aayenge,
hey kirpa nidhaan hamse kaisa malaal hai,
de de baba, VOTE ka swaal hai. 

Monday, 26 July 2010

Netaji...straight to hell

Neta ji swarg sidhaare

Neta ji swarg sidhaare,
sabhi jaali Stamp ppr lekar sidhe wahin padhaare.

padhaarte hi commission  par bhaashan dene lage,
swargwaasiyon ko SWISS BaNKka pataa dene lage.

kuchh hi ghanto mein  neta ji ka bol-baala barh gaya,
neta ji ki jai-jai kaar hui, Indra ka singhaashan hil gayaa,

singhaashan ke hilte hi Indra ghabra gaye, aur
ye soch kar pralaap karne lage-Prabhu humein neta se bachaao,
isko narak ka mantri banaao,
ye naa to JAIL se darta hai,
har dum bhaashan hi charta hai,
zidd par utar aaye to aamran ann-shan par baith jaayega,
swarg mein bhi dange karwaayega.

Prabhu ye aisa praani hai,
jo prithvi aur swarg mein smaan roop se rah sakta hai,
jhuth ko sach aur sach ko jhuth kar sakta hai.

Yeh hamaara baaja bjaa dega,
aapke saamne hi humein narak ka raja banaa dega,
Iss bhayankar AIDS ki bimaari se humein bachaao,
Indra ki kursi par neta na baithaao. 

Sunday, 23 August 2009

Agar MAI nETA hota...


Agar MAI NeTA  hota,
Toh kya hota toh kya hota.

Roz nayi yojna banata,
roz naye vaqtavya chhapata,
roz naye order nikalkar,
Theke, Theke apno ko dilwata.

Sadak todkar baandh banata,
baandh todkar nadi bahata.
Tab mai uski jaanch karata,
jaanch karakar mai kya pata,
wah mai tumko nahi batata.

Par yah sab toh tab hi hota,
Jab mai neta hota. 

Saturday, 29 March 2008

Desh Mahaan



Jagah-Jagah par poster lage hai Mera desh mahaan.
Sansad mein sab chor base hai
Thagg base hai thane mein,
Kursi par aise hai baithe jaise
Saanp lipte hon chandan mein
Media ab kya kare bakhaan,
Jagah-Jagah par poster lage hai Mera Desh Mahaan.


Kahin aag lagi kahin dhuwan utha
Kahin bhukamp kaa kahar toota,
Daan daataon ki soochi akhbaar mein
paisa sab dalaalon ne loota,
Sarkaar kaa bik jata naam
Jagah-Jagah par poster lage hai Mera Desh Mahaan.

Gaaon mein bijali ke khambe-taar
light naam ki cheez nahin,
Bhakara-Tehri Dam lage hai
nalon mein phir bhi paani nahin,
paani ki lambi lagi kataar
Jagah-Jagah par poster lage hai Mera Desh Mahaan.

Pati-Patni kaa rishta ajeeb hai
Saal ke baad talaak jarur hai,
Beta baap ko baap na samajhe
Baap ke paison kaa bahut grur hai,
Yeh sab dekh Kya kare Bhagwan
Jagah-Jagah par poster lage hai Mera Desh Mahaan.

Mahangai aasman ko chhuti,
Sensex bhi kya khoob gira.
Paise ki kadar nahi hai bhai,
Dollar bhi toh doob gaya.
Jeena ab ho gaya haraam, 
Jagah-Jagah par poster lage hai Mera Desh Mahaan.

Udyogpati toh khoob chadhe hai,
Karmchaari ka bhavisah latka hai.
IT ka hai ye bolbala,
Kaam bhi toh kya fatka hai.
Recession mil gaya hai naam,
Jagah-Jagah par poster lage hai Mera Desh Mahaan.


Rojgaar ki ujari duniya
Madhyam varg ke logon ki,
Ghar ka kharcha kaise chalega,
Fikar lagi hai roti ki.
Bhagwan bhi ab hai hairaan,
Jagah-Jagah par Poster lage hai Mera Desh Mahaan.

Maa baap ne tumko janam diya,
Duniya ke rang dikhaye hai.
Dhalti umar dekh ab unki,
Vridhashram mein bithaye hai.
Mata ka hota hai apmaan.
Jagah-Jagah par poster lage hai Mera Desh Mahaan.

Raajneeti kya khoob ho rahi,
Har netabhookha nanga hai.
Desh chalau kurshi ke liye,
Gali mohalle mein danga hai.
Naara gunja bina shanti ke,
De do hamein shanti ka daan,
Jagah-Jagah par poster lage hai Mera Desh Mahaan.